काठमाडौं– पोखरा महानगरपालिका मेयर धनराज आचार्यले नियमित काममा फर्कन अझै केही समय लाग्ने बताएका छन् । 

फागुन ३ गते पोखरा महानगरपालिकाले आयोजना गरेको पोखरा भ्रमण वर्ष २०२५ को औपचारिक घोषणाका क्रममा बेलुन विस्फोटमा परी उनी घाइते भएका थिए । 

यस्तै सरकारका अर्थमन्त्री विष्णु पौडेल पनि घाइते भएका थिए । उनी आइतबारबाट नियमित काममा फर्किएका छन् । तर मेयर। आचार्यलाई भने काममा फर्कन अझै केही समय लाग्ने बताइएको छ । 
 
मेयर आचार्यको दुवै हातमा पोलेको छ । यस्तै घाटी र अनुहारको भागमा पनि जलेकाले डाक्टरले केही समय रेस्ट गर्न भनेको आचार्यको भनाइ छ ।

कीर्तिपुरस्थित बर्न अस्पतालमा उपचारत उनी ६ दिनपछि ९ गते अस्पतालबाट डिस्चार्ज भएका थिए । तर उनी नियमित फलोअपमा छन् । 

‘नियमित काममा फर्किन सकेको छैन । सुधारोन्मुख छ । आज डेसिङ खोल्ने तयारी छ । सम्भवतः २० गतेसम्ममा काममा फर्कने योजनामा छु । जलनको घाउ पछाडि बढ्ने भएकाले गाह्रो हुने रहेछ । पहिला घाटीमा मात्र थियो तर पछि अनुहारमा पनि देखियो ।’ उनले सोमबार खबरहबलाई भने, ‘देब्रे हात घाटीको ब्यान्डेज  आज निकाल्ने दिन छ । अनुहार खुल्ला नै छाडेको छ । ६ प्रतिशत जलन भएछ । मलाई सुगर भएकाले पनि ब्यालेन्स गर्नुपर्ने रहेछ । घाउ निको हुन समय लाग्छ रे ।’ 

उनले औषधि सेवन गरिरहेकाले दुख्ने पोल्ने कम भएको बताए । उनले बोल्न समस्या नभएको तर डाक्टरले इन्फेक्सन हुने डरले बाहिर निस्कन अनुमति नदिएको बताए ।