रुपन्देही– सुप्रिम सहकारी संस्थाको बचत रहम ठगी प्रकरणमा राष्ट्रिय स्वतन्त्र पार्टीका सभापति रवि लामिछानेविरुद्धको मुद्दाको थुनछेक बहस जारी छ ।

तीन दिनदेखि जारी सुनुवाइका क्रममा शुक्रबार पनि थुनछेक बहस नसकिएपछि जिल्ला अदालतले रविलाई परिवारको जिम्मा लगाएर पठाएको छ ।

न्यायाधीश प्रल्हादकुमार योगीको इजलासमा तीन दिनदेखि जारी थुनछेक बहसमा शुक्रबार जाहेरवाला अर्थात् पीडित पक्षका वकिल र लामिछाने पक्षका कानुन व्यवसायीले बहस गरे ।

रविको तर्फबाट शुक्रबार सुरूमा वरिष्ठ अधिवक्ता सुशील पन्तले गरे । सुरज बस्नेत, नारायणदत्त कँडेल, सुरेन्द्र थापा, अधिवक्ता पशुपति भण्डारी, राजेन्द्र सेढाइँ र सुनीता राउतसहितले बहस गरे ।

दुवै पक्षको बहस नसकिएपछि अब आइतबार थप बहस हुनेछ । भोलि शनिबार परेकाले आइतबार बाँकी बहस सकेर अदालतले पुर्पक्षसम्बन्धी आदेश दिने सम्भावना छ ।

बुधबार र बिहीबार पनि बहस नकिएपछि रविलाई परिवारको जिम्मा लगाइएको थियो । अब रवि पक्षका वकिलहरूले बहसपछि जवाफी बहस थालिनेछ । आइबार सरकारी वकिल र जाहेरवालाका वकिलले बहस गरिसकेपछि न्यायाधीश योगीले पुर्पक्षसम्बन्धी आदेश दिनेछन् ।

उक्त सहकारीका एक हजार ८३१ बचतकर्ताको ८६ करोड १८ लाख २३ हजार ७५४ रूपैयाँ हिनामिना भएको दाबि सरकारको छ । यसमा रवि र उनका साझेदारहरूसहित २८ जनाविरुद्ध मुद्दा चलेको छ ।

रवि यसअघि पुस २५ मा कास्कीमा ६५ लाख र माघ २ गते काठमाडौंमा ६० लाख धरौटीमा रिहा भएका छन् ।

अब रविलाई चितवन र पर्सा लैजान बाँकी छ । त्यहाँ पनि मुद्दा चलाउने तयारी सरकारको छ । पक्राउ पुर्जी जारी भएपछि रविलाई चितवन र पर्सा लगेर बयान लिने काम भइसकेको छ ।