काठमाडौं – वनमन्त्री ऐनबहादुर शाही ठकुरीले वन मन्त्रालय विकासविरोधी नभएको बताएका छन्‌ ।

शुक्रबार चितवनको रत्ननगर नगरपालिका–९ मा रहेको टिकौली मध्यवर्ती सामुदायिक वन उपभोक्ता समूहको आठौं वार्षिक साधारणसभामा बोल्दै विभागीय मन्त्री शाहीले मन्त्रालयलाई विकास विरोधीको रूपमा मात्रै हेरिएको गुनासो गर्दै विकासको साझेदारकै रूपमा वन मन्त्रालय अघि बढेको बताएका हुन्‌ ।

मन्त्री ठकुरीले मध्यवर्ती क्षेत्रहरुमा मानव र वन्यजन्तुबीचको द्वन्द्व पछिल्लो समयमा बढ्दै गएको बताउँदै द्वन्द्व न्यूनीकरणका लागि वन मन्त्रलयले आवश्यक गृहकार्य गरिरहेको जानकारी दिए । उनले यस समस्या समाधान निम्ति अध्ययन गर्न विशेष समिति नै बनाएको बताए ।

कार्यक्रममा टिकौली मध्यवर्ती सामुदायीक वन उपभोक्ता समूहका अध्यक्ष बुद्धिसेन चौधरीले टिकौली वन भएर बग्ने खगेरी खोला सौराहाको पर्यटनको लाइफ लाइन हुनसक्ने भएकाले यसको विकासका लागि ध्यान दिनुपर्ने धारणा राखे ।