काठमाडौं – बालबालिका लक्षित गायन रियालिटी शो ‘नेपाल किड्स आइडल’ आयोजना हुने भएको छ ।

‘जय मिडिया मेनेजमेन्ट’को आयोजनामा सुरु हुन लागेको यस शोमा पाँच देखि १५ वर्ष उमेर समूहका बालबालिका सहभागी हुन पाउनेछन् ।

जय मिडियाका संस्थापक जय राज रायका अनुसार यस शोको अडिसन नेपालका सबै जिल्ला र भारतको सिक्किम, दार्जिलिङ, आसाम, देहरादुनलगायतका स्थानमा हुनेछ ।

फागुनबाट अडिसन सुरु हुने संस्थापक राय बताउँछन् । भन्छन्, ‘माघमै अडिसन सुरु गर्ने योजना थियो, प्राविधिक कारणले अलि ढिला अडिसन सुरु हुने भयो ।’

यस शोको विजेताले १० लाख, उपविजेताले पाँच लाख र तेस्रोले तीन लाख र चौथोले दुई लाख रुपैयाँ नगद पुरस्कार तोकिएको छ ।

शोको निर्णायक चाँडै सार्वजनिक गरिने रायले बताए ।