सोलुखुम्बु– सोलुदूधकुण्ड नगरपालिका–११ तिङ्लामा हिउँदमा गएको सुक्खा पहिरोको अध्ययन गर्न भू-गर्भविदको टोली खटिएको छ ।

सोलु खोलामाथि सारेलोक चौरमा लगातार पहिरो जाँदा दुई सय रोपनी खेतीयोग्य जमिन बगाएको छ भने सिंगो बस्ती नै जोखिम परेपछि उक्त क्षेत्रको अध्ययनका लागि भूगर्भविदको टोली आएको सोलुखुम्बुका प्रमुख जिल्ला अधिकारी लिला कुमारी केसी पाण्डेले जानकारी दिए।

राष्ट्रिय विपद् जोखिम न्युनीकरणबाट ४ जनाको टोलीले भोलिसम्म अध्ययन गर्ने उल्लेख गरिएको छ। त्यस क्षेत्रको भुगोलको अवस्था, पहिरो जानुका कारण लगायतका विषयमा अध्ययन गर्ने प्रजिअ पााण्डेले बताए।

सोलु खोलामाथि रहेको तिङ्लामा करिब साढे १ किलोमिटर जमिन नै पहिरोले बगाउँदा बस्तीमा जोखिम बढेको हो। स्थानीयले धान रोप्दै आएको खेत बगाउँदा आधा दर्जन घरपरिवार जमिनविहीन हुन पुगेका छन्।

गत वर्ष मंसिर ५ गतेबाट सुरू भएको पहिरो गाउँसम्म आइपुगेपछि स्थानीयको निद्रा हराएको छ। पहिरो पछि स्थानीय सरकार र संघीय सरकारले चाँडै भूगर्भविद्को टोली झिकाएर स्थलगत रूपमा जमिनको अध्ययन गर्ने प्रतिवद्धता जनाएका थिए।

भूगर्भविद्को अध्ययनपछि बस्ती स्थानान्तरणबारे निचोडमा पुग्ने जनाएको छ ।