चितवन – मंगलबार साँझ करिब ५ बजे तुइनखोला पुल नजिकै ठूलो पहिरो खस्दा मुग्लिन–नारायणगढ सडकखण्ड पुनः अवरुद्ध भएको छ। सडक तत्काल खुल्ने सम्भावना न्यून देखिएकाले चितवन जिल्ला प्रशासन कार्यालयले यात्रु र सवारी चालकलाई वैकल्पिक मार्ग प्रयोग गर्न आग्रह गरेको छ।

प्रशासनले राति सार्वजनिक गरेको सूचनामा बर्दिवास (महोत्तरी), हेटौँडा (मकवानपुर), बुटवल (रुपन्देही), कावासोती र गैँडाकोट (नवलपरासी बर्दघाट सुस्तापूर्व), नौबिसे (धादिङ) तथा खैरेनीटार (तनहुँ) हुँदै यात्रा गर्न सकिने उल्लेख छ।

‘जोखिम मोलेर यात्रा नगर्नुहोस्। ज्यान सुरक्षित राखौँ, यात्रा पछि गरौँ। बाटो खुल्ने आशामा बस्दा आफैंलाई हैरानी पर्न सक्छ,’ सूचनामा भनिएको छ, ‘हालका लागि यो बाध्यात्मक विकल्प हो। सडक खोल्ने प्रयास भइरहेका छन्। बाटो सञ्चालनयोग्य भएपछि फेरि जानकारी दिइनेछ।’

यस विषयमा थप जानकारीका लागि जिल्ला प्रहरी कार्यालय चितवनका सूचना अधिकारी प्रहरी नायब उपरीक्षक रवीन्द्र खनाल (९८५५०१३९९९), जिल्ला प्रशासन कार्यालय चितवनका सूचना अधिकारी मदन लामा थिङ (९८५५०९२२००) तथा सडक डिभिजन भरतपुरका सूचना अधिकारी कृष्णप्रसाद आचार्य (९८५५०९२२१८) लाई सम्पर्क गर्न सकिने प्रशासनले जनाएको छ।