काठमाडौँ- अर्थमन्त्री रामेश्वर खनाल र नेपालका लागि भारतीय राजदूत नवीन श्रीवास्तवबीच मंगलबार दिउँसो सिंहदरबारमा भेटवार्ता भएको छ ।

दुईजनाबीच सिंहदरबारमा समसामयिक विषयमा लामो संवाद भएको हो । रोचक त के छ भने अर्थमन्त्री खनालले आफ्नो कार्यकक्षमा राखेको लिम्पियाधुरा र कालापानी समेटिएको चुच्चे नक्सामुनि भारतीय राजदूतसँग संवाद गरेका छन् ।

उक्त चुच्चे नक्सालाई अझै पनि भारतले मान्यता दिन मानेको छैन । नेपालले आफ्नो क्षेत्र भनिरहेको लिपुलेक, लिम्पियाधुरा र कालापानी समेटिएको चुच्चे नक्साबारे भारतले कूटनीतिक रुपमा अस्वीकार गरिरहेको छ ।

उता उत्तरी छिमेकी चीनले पनि नेपाली भूमि लिपुलेक हुँदै व्यापार गर्न भारतसँग सम्झौता गरेको छ। चिनियाँ राजदूत छन सोङसँग पनि खनालले चुच्चे नक्सामुनि नै संवाद गरेका छन् ।

यसअघि तत्कालीन प्रधानमन्त्री केपी शर्मा ओलीले सांघाई शिखर सम्मेलनमा सहभागी हुने क्रममा लिपुलेक नेपाली भूमि भएकाले भारत-चीन सहमति स्वीकार्न नसकिने बताएका थिए । उक्त कुरा राखेपछि गत भदौ ३१ गतेदेखि हुने भनिएको ओलीको भारत भ्रमण अनिश्चिततामा धकेलिएका बेला जेन-जी आन्दोलनका कारण ओलीले भदौ २४ गते राजीनामा दिए ।

चुच्चे नक्सामुनि भएको वार्तामा भारत सरकार नेपालमा जेन-जी आन्दोलनबाट बनेको सरकारलाई सहयोग गर्न तयार रहेको कुरा राजदूतले बताएका थिए । उनले विगतदेखिका विकास निर्माणका कामलाई पनि निरन्तरता दिने गरी सहयोग कायमै राख्ने बताएका थिए ।