काठमाडौं– शहिद धर्मभक्त राष्ट्रिय प्रत्यारोपण केन्द्रका कार्यकारी निर्देशक एवं अङ्ग प्रत्यारोपण सर्जन डा. पुकार चन्द्र श्रेष्ठ मंंगलबारदेखि सर्जरी सेवाबाट सेवा निवृत्त भएका छन् । 

२०७८ साल असोज ७ गते केन्द्रको कार्यकारी निर्देशकमा नियुक्त भएका श्रेष्ठले नेपालमा अंग प्रत्यारोपण क्षेत्रको विकासमा उल्लेखनीय योगदान पुर्‍याएका छन् । 

१३ वर्ष पहिले भक्तपुरमा केन्द्र स्थापना भएको केन्द्रलाई शून्य देखि शिखरसम्म पुर्‍याएर झन्डै १६ सय जनामा मिर्गौला प्रत्यारोपण र ३५ जनामा कलेजो प्रत्यारोपण गर्न सफल भएका केन्द्रले जनाएको छ । 

अंग प्रत्यारोपण क्षेत्रमा लामो अनुभव र उत्कृष्ट सफलता हासिल गरेका डा.श्रेष्ठ नेपालमा कलेजो प्रत्यारोपण तथा मस्तिष्क मृत्यु भएका अंगदाताबाट अंग प्रत्यारोपण प्रक्रिया सुरु गर्ने पहिलो शल्य चिकित्सक पनि हुन् । 

उनले नेपालमै पहिलो पटक मस्तिष्क मृत्यु भएको अंगदाताबाट एकै व्यक्तिमा कलेजो र मिर्गौला दुवै प्रत्यारोपण गरी महत्त्वपूर्ण उपलब्धि हासिल गरेका छन् ।