काठमाडौं- राष्ट्रिय स्वतन्त्र पार्टी(रास्वपा)ले भिजिट भिसा प्रकरणमा उच्चस्तरीय छानबिन समिति गठन हुनुपर्ने माग राख्दै बुधबार पनि प्रतिनिधिसभा बैठकमा विरोध जनाएको छ ।  

बुधबार प्रतिनिधिसभा बैठक सुरु हुने बित्तिकै रास्वपाका सांसदहरूले उठेर विरोध जनाएका थिए । त्यसपछि सभामुख देवराज घिमिरेले रास्वपाकी सांसद बिन्दबासिनी कंसाकारलाई बोल्न समय दिए  ।

सांसद कंसाकारले तस्करहरू अझै सरकारसँग नडराएको भन्दै उच्चस्तरीय छानबिन समिति गठन हुनुपर्ने बताइन् । स्पेनको कार्यक्रममा समेत नक्कली सहभागी बनाएर लगेको तथ्य सार्वजनिक हुँदासमेत सरकारले नदेखेको उनले बताइन् ।

उनले यस विषयमा उच्चस्तरीय न्यायिक वा संसदीय समिति नबनेसम्म आन्दोलन रहने उल्लेख गरिन् । 

त्यस्तै उनले घुस प्रकरणमा जोडिएका मन्त्रीहरूमाथि कारबाही गर्न माग गरिन् । आफ्ना मागको सुनुवाइ नभएको भन्दै रास्वपाका सांसदहरूले सदन बहिष्कार गरेका छन् ।