बुटवल- उपप्रधानमन्त्री तथा अर्थमन्त्री विष्णु पौडेलले एमालेलाई विभाजन गर्न खोज्नेहरूको सपनामा तुषरापात भएको बताएका छन् ।

मुलुकको सर्वोच्च संस्था राष्ट्रपति पदमा आशिन भइसकेको व्यक्ति पार्टी राजनीतिमा आउनु उपयुक्त नहुने भनेर केन्द्रीय कमिटीले एकमतले निर्णय गरेपछि विभाजन चाहनेको सपना तुहिएको उनले जिकिर गरे ।

पुष्पलाल स्मृति दिवसको अवसरमा एमालेले बुधबार बुटवलमा गरेको अन्तक्रिया कार्यक्रमलाई सम्बोधन गर्दै एमाले उपाध्यक्षसमेत रहेका पौडेलले यस्तो बताएका हुन् ।

‘एमाले पार्टी विभाजनमा भूमिका खेलेकाहरूले अहिले फेरि पनि विभाजन गर्न सकिन्छ कि भनेर कोशिस गरिरहेका थिए’, उनले भने, ‘तर पार्टीले एकमतले निर्णय गरेपछि उनीहरूको सपनामा तुषारापात भएको छ । पार्टीभित्र अस्थिरता मच्चाउने र विभाजनको कोशिश गर्ने तत्वको सपना विफल भएको छ ।’