मस्को– रूसी राष्ट्रपति भ्लादिमिर पुटिनले इजरायल र अमेरिकाले इरानमाथि गरेका आक्रमणहरूलाई अवैध र अन्तर्राष्ट्रिय कानुनको उल्लङ्घन भनेका छन्।

पुटिनले सोमबार इरानी विदेशमन्त्री अब्बास अराक्चीसँग क्रेमलिनमा भेटवार्ता गर्दै इजरायल र अमेरिकी कारबाहीहरू निराधार र अनुचित भएको बताएका हुन्।

इरानी मन्त्री अराक्ची मस्को आइपुगेपछि पुटिनसँग भेट गरेका थिए। उनले विशेषगरि अमेरिकी आक्रमणपछि उत्पन्न परिस्थितिमा यस भ्रमणको उद्देश्य रूससँग अझ नजिकको, स्पष्ट र गम्भीर परामर्श गर्नु रहेको बताएका थिए। 

भेटवार्ताको क्रममा पुटिनले इरानमाथिको आक्रमणलाई उक्साहटबिना गरिएको आक्रामकताको संज्ञा दिँदै भने, ‘यस्ता कार्यहरूको कुनै पनि औचित्य हुन सक्दैन।’

उनले थपे, ‘इजरायल र अमेरिकाको व्यवहार अवैध छ । यो अन्तर्राष्ट्रिय मान्यताहरूको उल्लङ्घन हो।’ रूसी राष्ट्रपति पुटिनले अराक्चीलाई मस्कोमा भेट्न पाएकोमा खुशी व्यक्त गरे। उनले भने, ‘यो भ्रमणले हामीलाई यी गम्भीर विषयमा छलफल गर्न र वर्तमान संकटको समाधानबारे संयुक्त रूपमा सोच्न मद्दत गर्नेछ।’

अराक्चीले पुटिनको मूल्यांकनमा सहमति जनाउँदै भने, ‘आजको दिनमा रूस इतिहास र अन्तर्राष्ट्रिय कानुनको सही पक्षमा उभिएको छ।’

अराक्चीले थप जोड दिए, ‘ुइरानले इजरायलमा लक्षित आक्रमण गरेर आफ्नो सार्वभौमिकताको वैध रक्षा गरिरहेको छ।’

इजरायल र अमेरिकाले इरान परमाणु हतियारको नजिक पुगेको चिन्ताका कारण आक्रमण आवश्यक रहेको बताएका छन् । तर इरानी अधिकारीहरूले बम बनाउने कुनै प्रयास नगरेको पटकपटक बताएका छन् । इरानी अधिकारीहरूले शान्तिपूर्ण परमाणु कार्यक्रम चलाउने अधिकार आफूहरूमा रहेको दाबी गर्दै आएका छन्।