काठमाडौं– नेपाली कांग्रेस कपिलवस्तुले पार्टीका तर्फबाट लुम्बिनी प्रदेश सरकारमा सहभागी मन्त्रीहरूलाई बहिष्कारको घोषणा गरेको छ । 

कांग्रेस कपिलवस्तुले प्रदेश सरकारले विनियोजन गरेको बजेटप्रति असन्तुष्ट जनाउँदै पार्टीका तर्फबाट सरकारमा सहभागी मन्त्रीहरूलाई जिल्लामा बहिष्कार गर्ने घोषणा गरेको हो । 

‘कपिलवस्तु जिल्लाको समग्र विकास योजनालाई वेवास्ता गरेको तथा पार्टीको निर्णयलाई समेत नमानी आफ्नो मनमानी गरेको हुँदा नेपाली कांग्रेसको तर्फबाट लुम्बिनी प्रदेश सरकारमा प्रतिनिधित्व गरेका सम्पूर्ण मन्त्रीहरूलाई कपिलवस्तु जिल्लाको सार्वजनिक तथा पार्टीको कुनै पनि कार्यक्रममा सहभागी नगराउने विज्ञप्ति जारी गरियो,’ जिल्ला सभापति अब्दुल कलामले भनेका छन् । 

लुम्बिनी प्रदेश सरकारले असार १ गते प्रदेश सभामा प्रस्तुत गरेको आर्थिक वर्ष २०८२-०८३ को वार्षिक कार्यक्रम तथा बजेटमा कांग्रेस कपिलवस्तुको गम्भीर ध्यानाकर्षण भएको विज्ञप्तिमा उल्लेख छ ।