काठमाडौं– इजरायलका प्रधानमन्त्री बेन्यामिन नेतन्याहुले गाजा युद्धसम्बन्धी टिप्पणीलाई लिएर बेलायत, फ्रान्स र क्यानडाका नेताहरूमाथि आक्रोश पोखेका छन् ।

नेतन्याहुले यी तीन देशका नेताहरूका अभिव्यक्तिबाट उनीहरू हमासलाई सत्तामा राख्न चाहेको भन्दै आक्रोश व्यक्त गरेका छन् ।

‘उनीहरू (बेलायती प्रधानमन्त्री किएर स्टार्मर, फ्रान्सेली राष्ट्रपति इम्यानुएल म्याक्रोन् र क्यानडाका प्रधानमन्त्री मार्क कार्नी) हत्यारा, बलात्कारी, बालहत्यारा र अपहरणकारीहरूको साथ दिइरहेका छन्’, उनले भनेका छन् ।

केही दिनअघि बेलायत, फ्रान्स र क्यानडाले गाजामा इजरायलद्वारा भइरहेको आक्रमणलाई ‘अत्यधिक’ निन्दा गरेका थिए। ती देशहरूले गाजाको मानवीय स्थितिलाई ‘असहनीय’ भनेर इजरायलको चर्को आलोचना गरेका थिए ।

यी तीनै मुलुकहरू १९ महिनाअघि हमासद्वारा इजरायलमा गरिएको घातक आक्रमणपश्चात् इजरायलको पक्षमै उभिएका थिए।

इजरायल र गाजाबीचको यो संघर्ष सन् २०२३ को अक्टोबर ७ देखि जारी छ । त्यसयता गाजामा कम्तीमा ५३ हजार मानिसको मृत्यु भइसकेको छ । इजरालयले १५ हजार बालकालिकाकै ज्यान लिइसकेको छ ।