काठमाडौं– चालु आर्थिक वर्षको ७ महिनामा साढे ३ लाख बढी नेपालीले व्यक्तिगत स्थायी लेखा नम्बर (प्यान) लिएका छन् । अर्थ मन्त्रालयको माघ महिनाको अर्थ बुलेटिनअनुसार चालु आर्थिक वर्षको माघ मसान्तसम्म ३ लाख ६३ हजार ७०२ जना नेपालीले व्यक्तिगत स्थायी लेखा नम्बर लिएका हुन् ।

अर्थ मन्त्रालयका अनुसार समीक्षा अवधिसम्म ४६ लाख १२ हजार ४०६ जना नेपालीले व्यक्तिगत स्थायी लेखा नम्बर लिएका छन् ।

त्यस्तै चालु आर्थिक वर्षको ७ महिनामा ६८ हजार ४८५ करदाताले व्यावसायिक स्थायी लेखा नम्बर लिएका छन् । अर्थ मन्त्रालयकाअनुसार माघ मसान्तसम्म नेपालमा व्यावसायिक स्थायी लेखा नम्बर लिने करदाताको संख्या २० लाख १२ हजार ५८६ पुगेको छ ।

मूल्य अभिवृद्धि र अन्तःशुल्क करतर्फ दर्ता हुने करदाताको संख्या हालसम्म क्रमशः ३ लाख ४१ हजार ७१६ र १ लाख २३ हजार १३२ पुगेको मन्त्रालयको बुलेटिनमा उल्लेख छ ।