काठमाडौं – गायक प्रकाश सपुत यतिबेला विवादमा छन् । यो विवादबीच उनको लेखन, निर्देशन र अभिनय रहने फिल्म ‘वसन्त’लाई समेत प्रभाव पार्ने किसिमका प्रतिक्रियाहरू आइरहेका छन् ।

उनले केही साताअघि एक पुस्तक विमोचन कार्यक्रममा प्रधानमन्त्री तथा नेकपा (एमाले) का अध्यक्ष केपी शर्मा ओलीको खुलेर प्रशंसा गरेका थिए । त्यस्तो प्रसंशा गरेका सपुतलाई धेरैले एमाले निकट रहेको आरोप लगाएका छन् ।

ओलीको सरकार सञ्चालनसँग असन्तुष्टहरूले प्रकाशको आलोचना गरेका हुन् । सोहीकारण केहीले चैत २२ बाट प्रदर्शनमा आउन लागेको फिल्म ‘वसन्त’ बहिस्कार गर्ने चेतावनी दिएका छन् ।

उक्त आलोचनाबारे प्रकाश मौन बसेका थिए । तर, शनिबार साँझ सामाखुसीमा आयोजित ‘वसन्त’को ट्रेलर सार्वजनिक कार्यक्रममा प्रकाशले आलोचनाबारे मौनता तोडेका छन् ।

विवादको प्रसङ्ग प्रकाश आफैँले कोट्याए । कार्यक्रम सञ्चालकले प्रकाशको प्रशंसा गरेका थिए । त्यसपछि प्रकाशले आफूले ओलीको प्रशंसा गरेको घटनालाई इङ्गित गर्दै भने, ‘कार्यक्रम सञ्चालकले मेरो प्रशंसा गर्नुभयो । तर, मलाई प्रशंसा गर्न कसैले जित्न सक्दैन ।’

प्रकाशले यो प्रसङ्ग कोट्याएपछि सञ्चारकर्मीका प्रश्न उनीतर्फ नै तेर्सिए । ‘प्रशंसा गर्दा पनि आलोचना सहनुपर्ने रहेछ है ?’ भन्ने प्रश्नमा उनको जवाफ थियो, ‘कहिलेकाहीँ यस्तो पनि हुनेरहेछ ।’

तथापि उनले ओलीको प्रशंसालाई आफ्नो गल्ती भनी स्वीकार गरेनन् । कार्यक्रमको प्रकार र माहोलअनुसार आफ्नो विचार राखेको उनले तर्क गरे ।

सपुतले भने, ‘सार्वजनिक कार्यक्रममा आफ्ना एक खालका विचारहरू राखिन्छ । माहोल अनुसारको विचार व्यक्ति गरिन्छ ।’

सर्जकको हिसाबले भने आफूले सधैँ तटस्थ रहेर आलोचना गर्ने बताए । उनले भने, ‘व्यक्तिलाई गाली गर्ने मेरो शैली होइन । म कलाकार हुँ । सिर्जनामा समाजको चेतना र समाजलाई शासन गर्नेहरूलाई पनि प्रश्न गर्ने काम मेरो हो ।’

‘वसन्त’की नायिका स्वस्तिमा खड्काले प्रकाश सिर्जनामार्फत् नै बढी प्रश्न उठाउने सर्जक रहेको बताइन् । उनले भनिन्, ‘मैले उहाँसँग जति काम गरेँ । त्यहाँ उहाँले समाज र यही रहेका व्यक्तिहरूलाई नै प्रश्न उठाउनुभएको छ ।’