काठमाडौं– पाकिस्तानको रावलपिण्डी शहरमा पानीको चरम संकट देखा परेको छ । रावलपिण्डीमा खडेरी परेपछि पानी तथा सरसफाइ एजेन्सीले त्यहाँ संकटकाल घोषणा गरेको छ ।

पाकिस्तानको मौसम विभागले फेब्रुअरी र मार्च महिनामा त्यहाँ वर्षाको सम्भावना एकदमै न्यून रहेको चेतावनी दिएपछि संकट घोषणा गरिएको हो । 

जनसङ्ख्याको तीव्र वृद्धि, स्रोतको अभावजस्ता कारणले गर्दा खडेरी उत्पन्न भएको एजेन्सीका महानिर्देशक मुहम्मद सलिम अशरफलाई उद्धृत गर्दै डन अखबारले जनाएको छ ।

उनले शहरका बासिन्दालाई पानीको उपभोगमा मितव्ययिता अपनाउन समेत आग्रह गरेका छन् । रावलपिण्डीमा हरेक दिन ६ करोड ८० लाख ग्यालन पानीको माग रहेको जनाइएको छ । त्यहाँ आपूर्ति भने केबल ५ करोड १० लाख ग्यालनमात्र हुने गरेको छ ।