काठमाडौं- चीनमा लगानीको वातावरण बिग्रिँदै गएको पाइएको छ । चिनियाँ अर्थतन्त्रमा लगानी निरन्तर ओरालो लागिरहेको हो ।

नोभेम्बर ३० सम्मको तथ्यांक अनुसार चल सम्पत्तिमा हुने लगानी एक वर्षको अनुपातमा २.६ प्रतिशतले घटेको छ । यसअघि ब्लूमबर्गको सर्वेक्षणमा यो २.३ प्रतिशतले मात्रै घट्ने प्रक्षेपण गरिएको थियो ।

अक्टोबर महिनामा भने यस्तो लगानी १.७ प्रतिशतले घटेको थियो । यस गिरावटले आफ्नो अर्थतन्त्रलाई स्थीरता प्रदान गर्न चिनियाँ नेतृत्वमाथि दबाब पैदा हुने अपेक्षा गरिएको छ ।

विश्वकै दोस्रो ठूलो अर्थतन्त्रको रुपमा रहेको चीनमा विशेषगरी राज्यले प्रदान गर्ने वित्तको लगानी धेरै रहेको छ । खासगरी पूर्वाधार निर्माण तथा घरजग्गा र उच्च गुणस्तरीय उत्पादन क्षेत्रमा यस्तो लगानी धेरै छ ।

गत साता केन्द्रीय आर्थिक कार्यशाला गोष्ठिलाई सम्बोधन गर्दै चिनियाँ राष्ट्रपति सी जिन्पिङले अर्थतन्त्रलाई स्थीरता प्रदान गर्न र लगानीलाई सुदृढ गर्ने दिशातर्फ काम गर्ने जनाएका थिए । विश्लेषकहरुले राष्ट्रपति सीको यस भनाइलाई लगानीमा आइरहेको गिरावटलाई चिनियाँ नेतृत्वले पहिलो पटक सम्बोधन गरेको रुपमा अथ्र्याएका छन् ।