काठमाडौं – श्रम संस्कृति पार्टीका अध्यक्ष हर्क साम्पाङले अनुशासन उल्लङ्घन गरेको आरोपमा उपाध्यक्ष मित्र परियारलाई पदबाट निलम्बन गरेका छन् ।

बुटवलमा गत शनिबारआयोजित आमसभामा परियारले पार्टीको आचारसंहिताविपरीत अभद्र शैलीमा सार्वजनिक अभिव्यक्ति दिएको भन्दै उनलाई निलम्बन गरिएको अध्यक्ष राईले बताएका छन् ।

पार्टीले जारी गरेको विज्ञप्ती अनुसार, मित्र परियारले पार्टीका जिल्ला सहसंयोजक केशव न्यौपानेलाई पनि आपत्तिजनक र अपमानजनक शब्द प्रयोग गरी गाली गरेका थिए। यस प्रकारको व्यवहारलाई पार्टीले अस्वीकार गर्दै अनुशासनहीन कार्यकर्ताहरूमाथि कडा कारवाही गरिने विज्ञप्तीमा उल्लेख छ ।

‘श्रम संस्कृति पार्टीमा सबै सदस्य श्रमदातै हुन्। कोही नेता वा कार्यकर्ताले ‘केन्द्र समितिको हुँ’ भन्दै अन्य सदस्यलाई अपमान गर्ने प्रयास गरेमा त्यस्तो अभिव्यक्तिका लागि तुरुन्त कारवाही गरिने छ’ विज्ञप्तीमा उल्लेख छ ।

पार्टीले यस घटनाबाट सबै सदस्यहरूलाई अनुशासन र मर्यादाप्रति सचेत रहन आग्रह गरेको छ।