काठमाडौं– चालु आर्थिक वर्षको ५ महिनाको अवधिमा नेपालमा ७ खर्ब ६६ अर्ब १८ करोड ९१ लख ९२ हजार रुपैयाँ बराबरको वस्तु आयात भएको छ । जुन आयात गत आर्थिक वर्षको सोही अवधिको तुलनामा १५.८३ प्रतिशतले धेरै हो । 

भन्सार विभागका अनुसार गत आर्थिक वर्षको सो अवधिमा नेपालमा ६ खर्ब ६१ अर्ब ४८ करोड ८५ लाख ९४ हजार रुपैयाँ बराबरको वस्तु आयात भएको थियो ।

त्यस्तै समीक्षा अवधिमा नेपालबाट १ खर्ब १६ अर्ब ५० करोड ९० लाख ३६ हजार रुपैयाँ बराबरको वस्तु निर्यात भएको छ । सो निर्यात गत आर्थिक वर्षको सोही अवधिको तुलनामा ५८.१७ प्रतिशतले धेरै हो । 

गत आर्थिक वर्षको सोही अवधिमा नेपालबाट जम्मा ७३ अर्ब ६५ करोड ९७ लाख ७१ हजार रुपैयाँ बराबरको वस्तु निर्यात भएको थियो ।

आयात र निर्यात दुवै वस्तुमा सोयाबिन अगाडि

चालु आर्थिक वर्षको पाँच महिनामा नेपालमा आयात हुने र नेपालबाट निर्यात हुने वस्तुको शीर्ष स्थानमा सोयाबिन तेलको कच्चा पदार्थ रहेको छ । 

समीक्षा अवधिमा ४६ अर्ब ९७ करोड १ लाख ४८ हजार रुपैयाँको सोयाबिन तेलको कच्चा पदार्थ आयात भएको छ भने सो अवधिमा नेपालबाट ४६ अर्ब ५५ करोड ८६ लाख ६६ हजार रुपैयाँ बराबरको सोयाबिन तेल र त्यसको कच्चापदार्थ नेपालबाट निर्यात भएको विभागले जनाएको छ ।

समीक्षा अवधिमा नेपालमा ४५ अर्ब ६० करोड ६२ लाख ११ हजार रुपैयाँको डिजेल, २७ अर्ब ३३ करोड २ लाख १४ हजार रुपैयाँ बराबरको पेट्रोल र २२ अर्ब ३९ करोड ४६ लाख ६३ हजार रुपैयाँ बराबरको खाना पकाउने एलपी ग्यास आयात भएको छ ।

त्यस्तै, समीक्षा अवधिमा नेपालबाट ५ अर्ब ५३ करोड ३२ लाख ४९ हजार रुपैयाँ बराबरको ठूलो अलैँची, कार्पेट तथा टेक्सटाइल ४ अर्ब १३ करोड ४६ लाख ६० हजार रुपैयाँ बराबरको र सुर्यमुखी तेलको दाना तथा साफलोर तेल ३ अर्ब ७३ करोड ६८ लाख २३ हजार रुपैयाँ बराबरको निर्यात भएको छ ।