काठमाडौं– जनमत पार्टी कोशी प्रदेश अध्यक्ष बुद्धिराज न्यौपानेले पदबाट राजीनामा दिएका छन्। 

पार्टी अध्यक्ष डा. सिके राउतको अभिव्यक्तिप्रति आपत्ति जनाउँदै उनले पार्टीको साधारण सदस्य समेत नरहनेगरी राजीनामा दिएका हुन् ।

न्यौपानेका अनुसार नेपालको संविधान, राष्ट्रिय अखण्डता, राष्ट्रिय झण्डाप्रति सम्मान नहुने किसिमका अभिव्यक्तिले आफूलाई गम्भीर असहज भएको भन्दै पार्टीमा बसिराख्न नैतिक र वैचारिक आधार नरहेको निष्कर्ष निकालेका छन्। यस्ता अभिव्यक्तिले पार्टीप्रतिको आफ्नो विश्वास कमजोर भएको उल्लेख गरेका छन्।

न्यौपानेले आफू सधैं नेपाली पहिचान र राष्ट्रिय अखण्डताप्रति निष्ठावान् रहेको बताएका छन्। उनका अनुसार पार्टी नेतृत्वबाट नै राष्ट्रिय एकतामाथि प्रश्न उठ्ने परिस्थितिमा जनमत पार्टीमा निरन्तरता दिन सम्भव नभएको बताए ।