काठमाडौं— जेनजी आन्दोलनसँग आबद्ध रहेको समूहले प्रधानमन्त्री सुशीला कार्कीविरुद्ध गम्भीर आरोप लगाउँदै कानूनी छानबिनको माग गरेको छ। समूहका तर्फबाट रवि किरण हमालले नेपाल प्रहरीका महानिरीक्षकलाई सम्बोधन गरी मंगलबार एक औपचारिक पत्र बुझाएका छन्।

पत्रमा प्रधानमन्त्री कार्कीले जेनजी विद्रोहका क्रममा युवाहरूको बलिदानको अवमूल्यन गर्दै ‘अवैधानिक तरिकाले सत्ता कब्जा गरेको’ आरोप लगाइएको छ । उनले संविधान र जनताको म्यानडेट विपरीत सत्तामा पुगेको भन्दै उक्त कार्यलाई ‘राष्ट्रघात र कानूनी परम्पराको उल्लङ्घन’ भनिएको छ।

पत्रमा कार्की नेतृत्वको मन्त्रिपरिषदमा ‘भ्रष्टाचार, दातृ निकायसँग अनुचित सम्बन्ध र बलिदानप्रति असंवेदनशीलता देखाउने’ व्यक्तिहरू सामेल रहेको आरोप पनि गरिएको छ । यसबाहेक, आन्दोलनका क्रममा निर्दोष युवामाथि गोली चलाउने र दमनका जिम्मेवार व्यक्तिहरूलाई संरक्षण दिइएको, र त्यस्ता पात्रलाई पुनः सक्रिय राजनीति गराउने काम भएको दाबी पत्रमा गरिएको छ ।

हमालले पत्रमा लेखेका छन्, ‘प्रधानमन्त्री कार्कीले सर्वोच्च अदालतको प्रमुख न्यायाधीशको रूपमा रहँदा राजनीतिक आस्थाका आधारमा न्यायाधीश नियुक्त गर्ने र न्यायालयको स्वतन्त्रता कमजोर पार्ने कार्य गरेकी थिइन् ।’ समूहले प्रधानमन्त्री कार्कीलाई तत्काल पक्राउ गरी निष्पक्ष, पारदर्शी र सार्वजनिक कानूनी छानबिन गर्न माग गरेको छ । प्रहरी मुख्यालयले भने यसबारे कुनै टिप्पणी गरेको छैन ।