काठमाडौं– इजरायलका रक्षामन्त्री इजरायल काट्जले सशस्त्र समूह हमास हतियार बिसाएर सबै बन्धकहरू रिहा गर्न सहमत नभए गाजा सहर तहस–नहस गरिदिने चेतावनी दिएका छन् । 

इजरायली मन्त्रिपरिषद्ले अन्तर्राष्ट्रिय र घरेलु विरोधका बीच गाजा सहर कब्जा गर्ने योजनालाई अनुमति दिएपछि काट्जको चेतावनी सार्वजनिक भएको हो । 

रक्षामन्त्री काट्जले भनेका छन्, ‘यदि हमास सहमत भएन भने गाजालाई पनि राफा र बेत हनुनजस्तै खण्डहर बन्ने छ ।’ इजरायली सैन्य अभियानका कारण दुवै सहरहरू लगभग पूर्णरूपमा ध्वस्त भइसकेको छ । 

सशस्त्र समूह हमासले गत सोमवार कतार र मिस्रको मध्यस्थताबाट तयार गरिएको ६० दिने युद्धविराम प्रस्ताव स्वीकार गरेको थियो । 
उक्त प्रस्तावमा गाजामा बन्धक बनाइएकाहरूमध्ये आधालाई रिहाइ गर्नुपर्ने सर्त समावेश छ । 

यद्यपि, इजरायली प्रधानमन्त्री बिन्जामिन नेतन्याहुले बन्धकहरूका रिहाइका साथै ‘इजरायललाई स्वीकार्य सर्त’ मा गाजा युद्ध समाप्त गर्नका लागि वार्ताको निर्देशन दिएका छन् । 

गत महिना नेतन्याहुले युद्धविराम र बन्धक रिहाइका लागि भएको अप्रत्यक्ष वार्ता विफल भएपछि गाजा सहर नियन्त्रणको नयाँ योजनाको घोषणा गरेका थिए । –बीबीसीबाट