काठमाडौं– नेपाली कांग्रेसका सांसद रामहरि खतिवडाले नेपाली भूमि लिपुलेक भएर व्यापार नाका पुनः सञ्चालन गर्ने भारत र चीनको पछिल्लो सम्झौताबारे कूटनीतिक माध्यमबाट समाधान गरिनुपर्ने बताएका छन् । 

प्रतिनिधिसभाको शुक्रबारको बैठकको आकस्मिक समयमा बोल्दै उनले चीन र भारत भ्रमणका क्रममा प्रधानमन्त्री केपी शर्मा ओलीले दुवै देशका सरकार प्रमुखहरूसँग नेपाली भूमि लिपुलेकको समस्या समाधान गर्नुपर्ने बताएका हुन् ।

‘यसलाई सरकारले कूटनीतिक माध्यमबाट छिटोभन्दा छिटो समाधान गरोस् । सम्माननीय प्रधानमन्त्रीज्यू केही दिनपछि चीनको पनि भ्रमण गर्दै हुनुहुन्छ । र भारतको पनि भ्रमण गर्दै हुनुहुन्छ,’ उनले भने, त्यो बेला सरकार प्रमुखसँग सरकार प्रमुखका नाताले यो समस्या समाधान गर्न दुवै देशका सरकार प्रमुखसँग नेपालको आफ्नो स्ट्यान्ड राखेर कुरा होस् र समस्या समाधान होस् भनेर माग गर्न चाहन्छु ।’ 

सांसद खतिवडाले अहिलेको समयमा हरेक नेपालीले स्वाभिमान र राष्ट्रिय एकताका लागि प्रस्तुत हुनुपर्नेमा जोड दिए । सरकार पनि नेपालको सार्वभौमसत्ता र अखण्डताको पक्षमा अटल भएर उभिनुपर्ने उनको भनाइ थियो ।    

‘यस्तो बोलमा हामी सम्पूर्ण नेपालीहरू कुनै पार्टीको कुनै जातिको नभई सम्पूर्ण नेपालको तर्फबाट आफ्नो स्वाभिमान र राष्ट्रिय एकताका लागि प्रस्तुत हुनपर्छ,’ खतिवडाले भने, ‘यस्तो कुरामा सरकारलाई साथ दिनपर्छ । सरकारले पनि नेपालको सार्वभौमसत्ता र अखण्डताको पक्षमा अटल भएर उभिनुपर्छ ।’