काठमाडौं– भारतको रक्षा मन्त्रालयले नयाँ पुस्ताको लडाकु विमानको इन्जिन निर्माणका लागि फ्रान्ससँग सहकार्य गर्ने तयारी गरेको छ । अन्तर्राष्ट्रिय प्रतिस्पर्धापछि मन्त्रालयले फ्रान्ससँगको सहकार्य उत्तम हुने निष्कर्ष निकालेको हो ।

प्रविधि हस्तान्तरण एवम् दीर्घकालीन औद्योगिक सहकार्यलाई मध्यनजर गर्दै मन्त्रालयले फ्रान्ससँगको साझेदारीलाई अघि बढाउने तयारी गरेको हो । विभिन्न प्राविधिक समिति सम्मिलित सघन परामर्शपछि यो निर्णय लिइएको इण्डियन डिफेन्स रिसर्च विङले जनाएको छ ।

यसको लागत ७ अर्ब डलर हुने जनाइएको छ । भारतले हाल नयाँ पुस्ताको एडभान्स्ड मिडियम कम्ब्याट एअरक्राफ्ट (आम्का) को विकास गरिरहेको छ ।

समाचारमा जनाइएअनुसार भारतले वर्ष सन् २०२६–२७ मा आम्काका ५ वटा प्रारुप तयार पार्नेछ । यो विमानको पहिलो उडान सन् २०२८ मा हुने अपेक्षा गरिएको छ । सन् २०३२ मा प्रमाणित भएपछि सन् २०३५ मा यसको उत्पादन शुरु हुने जनाइएको छ ।