काठमाडौं– पाकिस्तानको बलोचिस्तान प्रान्तमा भएको बम विष्फोटनमा परी पाकिस्तानी सेनाका मेजरको ज्यान गएको छ । बलोचिस्तान प्रान्तको राजधानी क्वेटा शहरमा भएको बम विष्फोटमा कार्यक्षेत्रमा खटिएका सेनाका मेजर अनवर ककरको ज्यान गएको हो ।

उनी पाकिस्तानी सेनाको १२ औँ कोरमा आबद्ध रहेको बलोचिस्तान पोस्टले जनाएको छ । समाचरमा जनाइएअनुसार उनी चढेको सवारीलाई लक्षित गरी चुम्बकीय बम विष्फोट भएको थियो ।

उनी बलोचिस्तानकै पिशिन जिल्लाका बासिन्दा रहेको जनाइएको छ । उनी विगत एक दशकभन्दा लामो समयदेखि पाकिस्तानी सेनामा सेवा गरेका थिए ।

बलोचिस्तानमा पृथकतावादी सशस्त्र आन्दोलन चलाइरहेको बलोचिस्तान लिबरेसन आर्मी बीएलएले घटनाको जिम्मा लिएको छ । उक्त समूहले स्पेसल ट्याक्टिकल अपरेशन स्क्वाडले गरेको कारवाहीमा मेजर ककरको ज्यान गएको दाबी गरेको छ ।