काठमाडौं– हलिउडका चर्चित निर्देशक जेम्स क्यामरुनको बहुप्रतीक्षित फिल्म अवतार : फायर एन्ड ऐश आगामी डिसेम्बर १९, २०२५ मा विश्वभर रिलिज हुने भएको छ। फिल्म अवतार : फायर एन्ड ऐश को पहिलो पोस्टर ट्वेन्टीथ सेन्चुरी स्टुडियोज र डिज्नी को आधिकारिक खाताबाट आज सार्वजनिक गरिएको हो । पोस्टरमा नयाँ खलनायक वराङ को झल्को देख्न सकिन्छ, यो पात्रको भूमिका अभिनेत्री ऊना च्याप्लिनले निभाउनेछिन् ।

अवतार श्रृंखलाको तेस्रो भागका रूपमा प्रस्तुत गरिएको फायर एन्ड ऐश फिल्म ट्वेन्टीथ सेन्चुरी स्टुडियोजद्वारा निर्माण र वितरण गरिएको हो । यो फिल्म सन् २०२२ मा रिलिज भएको अवतार : द वे अफ वाटरको सिक्वेल हो ।

अवतारस् फायर एन्ड ऐश फिल्मको छायांकन अवतार : द वे अफ वाटर अर्थात् अवतार श्रृंखलाको दोस्रो भागसँगै सेप्टेम्बर २५, २०१७ मा न्युजिल्याण्डमा सुरु गरिएको थियो र लामो ३ वर्षको छायांकनपछि डिसेम्बर २०२० मा पूरा भएको थियो ।

भारतीय मिडिया अनुसार हालसम्म फिल्मको रिलिज मिति ९ पटक सारिएको छ, जसको पछिल्लो ढिलाइ अगस्ट ९, २०२४ मा भएको हो । अन्ततः, फिल्म डिसेम्बर १९, २०२५ मा रिलिज हुने निश्चित भएको छ ।

फिल्ममा पहिलेका मुख्य कलाकारहरू साम वर्थिङ्टन, जोई साल्डाना, सिगोर्ने वीभर लगायत अन्य कलाकारहरू पुनः देखिनेछन् । यो फिल्म दर्शकहरूलाई पाण्डोराको आकर्षक र अद्भुत संसारमा फेरि एकपटक लैजाने वाचा गर्छ ।

निर्माताहरूका अनुसार अवतारस् फायर एन्ड ऐश पछि थप दुई सिक्वेलहरू अवतार ४ र अवतार ५ क्रमशः सन् २०२९ र सन् २०३१ मा रिलिज हुने तयारीमा छन् । यी दुवै प्रोजेक्टहरू विभिन्न निर्माण चरणमा रहेका छन् ।