काठमाडौं– संस्कृति, पर्यटन तथा नागरिक उड्डयनमन्त्री बद्री पाण्डेले नेपाल एयरलाइन्सका लागि लिजमा जहाज थप्नेबारे छलफल भइरहेको बताएका छन् ।  

सिंहदरबारमा आइतबार बसेको प्रतिनिधिसभा अन्तर्गतको अन्तर्राष्ट्रिय सम्बन्ध र पर्यटन समितिको बैठकमा नेपाल हवाई सेवा प्राधिकरण विधेयक, २०८१ माथिको सैद्धान्तिक छलफलका क्रममा मन्त्री पाण्डेले अहिले नै नयाँ विमान खरिद गर्नुभन्दा पनि लिजमा लिएर जहाज सञ्चालन गर्नेबारे छलफल भइरहेको बताएका हुन् । 

उनले हरेक विमान खरिद गर्दा पारदर्शीताको प्रश्न र काण्डहरू आउने गरेकाले पारदर्शीतालाई सुनिश्चित गर्न संयन्त्र नै खडा गर्नुपर्ने देखिएको जिकिर गरे ।

मन्त्री पाण्डेले अहिले नेपाल एयरलाइन्सको अन्तर्राष्ट्रिय यात्रु ल्याउने लैजाने क्षमता १० प्रतिशतमात्रै रहेको र ९० प्रतिशत यात्रु बाहिरका एयरलाइन्सबाट यात्रा गरिरहेको उल्लेख गरे  ।

यसका कारण हवाई भाडामा एकरुपता कायम गर्न नेपाल एयरलाइन्सले मात्रै भाडा घटाएर वा बढाएर सम्भव नदेखिएको उनको भनाइ छ ।

त्यस्तै मन्त्री पाण्डेले अन्तर्राष्ट्रिय उडानको दुर्घटनामा यात्रुहरूले पाउनुपर्ने बीमाको रकम र स्वदेशी दुर्घटनामा परेका यात्रुहरूले पाउने बीमामा धेरै अन्तर रहेकाले त्यसलाई न्यायोचित गर्न आवश्यक कानून ल्याउने तयारी भइरहेको जानकारी दिए । छाता ऐनको रूपमा हवाई नीतिसँगै हवाई ऐनको तयारी गरिरहेको उनले बताए । 

मन्त्री पाण्डेले हवाई क्षेत्रलाई व्यवस्थित पार्ने दृष्टिकोणबाट नेपाल हवाई सेवा प्राधिकरणसम्बन्धी विधेयक ल्याएको उल्लेख गरे  । समितिको अर्को बैठकमा नेपाल हवाई सेवा प्राधिकरण विधेयक, २०८१ का सम्बन्धमा विज्ञहरूसँग छलफल गर्ने समिति सभापति राजकिशोर यादवले जानकारी दिए ।