वाशिङ्टन – इरानको आणविक केन्द्रमा अमेरिकाले आक्रमण गरेपछि त्यहाँका विधायकको मिश्रित प्रतिक्रिया आएको छ।

डेमोक्र्याट पार्टीका विधायक रो खन्नाले संसदबाट पास नगराई युद्धको घोषणा गर्ने अधिकार नभएको बताएका छन्।

अमेरिकालाई मध्यपूर्वमा अर्को अन्त्यहीन युद्धमा फस्नबाट बचाउनका लागि संसदमा मतदान आवश्यक रहेको उनले सामाजिक सञ्जालमा उल्लेख गरेका छन्।

यसैगरी, केन्टुकीमा रिपब्लिकबाट प्रतिनिधित्व गर्ने थोमस मासले यसलाई अवैधानिक बताएका छन्।

क्यालिफोर्नियाका डेमोक्र्याट विधायक सारा ज्याकोब्सले यसलाई अवैधानिक भन्दै अमेरिकालाई अन्त्यहीन युद्धमा प्रवेश गर्नबाट रोक्नु पर्ने बताएका छन्।

मेरी ल्यान्डका विधायक एन्डी हेरिसले भने यसको समर्थन गरेका छन्। उनले यसलाई आक्रमणमार्फत शान्तिको बाटोको रूपमा व्याख्या गरेका छन्। नेब्रास्काका डन बाकोनले राष्ट्रपति ट्रम्पले अमिरकालाई इरानबाट बचाउन चालेको आवश्यक कदम भनेका छन्।