काठमाडौं– अष्ट्रेलियाका सांसदहरुको टोलीले बंगलादेशको अन्तरिम सरकारलाई तत्काल निर्वाचनको खाका तयार पार्न आग्रह गरेका छन् । अष्ट्रेलियाको दुवै सदनका ४१ जना सदस्यहरुको टोलीले अन्तरिम सरकारलाई तत्काल र पारदर्शी रुपमा स्वतन्त्र निष्पक्ष र विश्वसनीय निर्वाचनको खाका तयार पार्न आग्रह गरेका हुन् ।

बंगलादेशमा लोकतान्त्रिक वैधताको बहाली र स्थीरताका लागि समावेशी निर्वाचन अपरिहार्य रहेको उनीहरुको ठहर छ । उनीहरुले बंगलादेशको राजनीतिक अवस्थाप्रति चिन्ता पनि व्यक्त गरेका छन् ।

उनीहरुले सबै राजनीतिक दललाई चुनावमा समान प्रतिनिधित्व प्रत्याभूति गर्नका लागि व्यवस्थापकीय तथा कार्यकारी कदम चाल्न पनि बंगलादेश सरकारसमक्ष आग्रह गरेका छन् । अष्ट्रेलियाका सांसदहरुले गत जुलाई महिनामा भएको आन्दोलनका क्रममा प्रहरीका तर्फबाट भएको भनिएका ज्यादतीबारे पारदर्शी अनुसन्धान गर्न पनि आह्वान गरेका छन् ।

हाल नोबेल पुरस्कार विजेता मोहम्मद युनुसको नेतृत्वमा रहेको बंगलादेशमा धार्मिक अल्पसङ्ख्यकमाथि दमन र हिंसाका घटना बढिरहेका बेला अष्ट्रेलियाका सांसदको टोलीले यस्तो आग्रह गरेको हो ।