काठमाडौं– फिलिपिन्सका राष्ट्रपति फर्डिनान्ड मार्कोस जुनियरले सबै मन्त्रीहरुलाई राजीनामा दिन उर्दी जारी गरेका छन् । बिहीबार उनले सबै मन्त्रीहरुलाई राजीनामा दिन निर्देशन दिएका हुन् ।

हालसम्म २१ मन्त्रीले राजीनामा दिने घोषणा गरिसकेका छन् ।

१० दिनअघि सम्पन्न निर्वाचनमा आफ्नो गठबन्धनले अपेक्षाकृत सिट जित्न नसकेपछि मार्कोस जुनियरले यस्तो निर्देशन दिएका हुन् । उक्त निर्वाचनमा सिनेटमा रहेका २४ मध्ये आधा १२ सिटका लागि प्रतिस्पर्धा भएको थियो ।

उक्त निर्वाचनमा १२ मध्ये ५ सिट उपराष्ट्रपति सारा डुटेर्टे समर्थकले जितेका थिए । मार्कोस जुनियरका समर्थकले पनि उक्त चुनावमा ५ सिट हात पारेका थिए । बाँकी २ सिट भने अनपेक्षित रुपमा पूर्वराष्ट्रपति बेनिग्नो अकिनो तृतीयका समर्थकले जितेका थिए ।

पछिल्लो समय फिलिपिन्समा शक्ति संघर्ष उत्कर्षमा पुगेको छ । अकिनो र मार्कोस परिवारबीच लामो समयदेखि मनमुटाव रहँदै आएको छ भने डुटेर्टे र मार्कोस परिवारबीच पनि पानी बाराबारको अवस्था छ ।

राष्ट्रपति मार्कोस जुनियर पूर्वराष्ट्रपति फर्डिनान्ड मार्कोसका छोरा हुन् भने उपराष्ट्रपति डुटेर्टे पूर्वराष्ट्रपति रोड्रिगो डुटेर्टेकी छोरी हुन् । हाल पूर्वराष्ट्रपति डुटेर्टे नेदरल्याण्ड्सको द हेगस्थित अन्तर्राष्ट्रिय अपराध अदालतको नियन्त्रणमा छन् । उनीमाथि लागूऔषध नियन्त्रण गर्न सञ्चालन गरिएको कारवाहीका क्रममा मानवताविरुद्ध अपराध गरेको आरोप लगाइएको छ ।

फिलिपिन्समा उपराष्ट्रपति सारा डुटेर्टेविरुद्ध महाअभियोगको प्रस्ताव लगिएको छ । उनले राष्ट्रपति मार्कोस, उनकी श्रीमती र तल्लो सदनका सभामुख मार्टिन रोमुवाल्देजलाई हत्याको धम्की दिएको आरोप लगाइएको छ । यद्यपि उनले यस आरोपको खण्डन गर्दै आएकी छिन् । रोमुवाल्देज मार्कोस जुनियरका मामा हुन् ।