काठमाडौं– कृषि तथा पशुपन्छी विकासमन्त्री रामनाथ अधिकारीले कृषिमा प्रयोग हुने यन्त्र तथा उपकरणको गुणस्तरमा प्रश्न उठाएका छन् । 

ललितपुरमा शनिबार आयोजित नेपाल कृषि मेशिनरी व्यवसायी संघको नवौँ वार्षिक साधारण सभालाई सम्बोधन गर्दे मन्त्री अधिकारीले यन्त्र तथा उपकरणको गुणस्तरमा प्रश्न उठाएका हुन् । 

‘एकातिर कृषिलाई यान्त्रीकरण गर्दे जानु पर्ने आवश्यकता छ, अर्को तर्फ यस्ता उपकरणको गुणस्तरीयतामा विश्वस्त हुने अवस्था छैन,’ मन्त्री अधिकारीले भने, ‘५० हजारमा किनेको मेसिन मर्मत गरिरहन किसानले खर्च धेरै गर्न परिरहेको छ । यो अवस्थाको अन्त्य हुनुपर्छ ।’  

कृषि यान्त्रिकीकरणको प्रवर्द्धनमा व्यवसायीहरूको भूमिका महत्वपूर्ण रहेको भन्दै उनले अब यस्ता यन्त्र र उपकरण स्वदेशमै बनाउन पहल गर्न आग्रह गरे । 

उत्पादन लागत घटाउन, उत्पादकत्व बढाउन र दिगो कृषि प्रणाली सुनिश्चित गर्न यान्त्रिकीकरणलाई प्राथमिकता दिँदै सरकार अघि बढेको मन्त्री अधिकारी बताए ।