काठमाडौं– अमेरिकी राष्ट्रपति डोनाल्ड ट्रम्पले भारतीय मूलका अमेरिकी नागरिक काश पटेललाई फेडरल ब्युरो अफ इन्भेस्टिगेशन (एफबीआई)को निर्देशकमा नियुक्त गरेका छन् ।

पटेलले हिन्दु धर्माबलम्बीहरूको ग्रन्थ गीतामा हात राखेर एफबीआईको निर्देशकका रूपमा शपथ ग्रहण गरेका छन् ।

पटेलले पदभार ग्रहणपछि भनेका छन्, ‘तपाईँ भारतको त्यो पहिलो पिँढीसँग कुरा गरिरहनुभएको छ कि जो विश्वको सबैभन्दा महान देशको ल इन्फोर्समेन्ट एजेन्सीको नेतृत्व गर्न गइरहेको छ । जुन संसारमा अन्य कुनै ठाउँमा हुँदैन । म प्रतिज्ञा गर्छु कि एफबीआई भित्र र बाहिर नागरिकलाई जवाफदेही बनाइने छ ।’

ट्रम्पका कट्टर समर्थक पटेलले अमेरिकी फेडरल ब्युरोमा अनेकौँ परिवर्तन गर्न सक्ने अनुमान गरिन लागेका छ । पटेल एफबीआई निर्देशकमा नियुक्त भएपछि राष्ट्रपति ट्रम्पले पटेलका प्रति एफबीआई एजेन्टहरूका मनमा रहेको सम्मानका कारण उनलाई निर्देशक पदमा नियुक्त गरिएको बताएका छन् ।।

‘उनी एक मजबुत र शक्तिशाली व्यक्ति हुन् । उनीसँग आफ्नै दृष्टिकोण छ,’ ट्रम्पले भनेका छन् । पटेलको शपथ ग्रहणपछि अमेरिकी राष्ट्रपति कार्यालय ह्वाइट हाउसले सामाजिक सञ्जाल एक्समा लेखेको छ, हामीले एफबीआईका अखण्डता र न्याय फेरि स्थापित गरेका छौँ । अमेरिकालाई फेरि सुरक्षित गर्नु छ ।’