काठमाडौं– सुदूरपश्चिम प्रदेशका विद्यालय देखि क्याम्पस तहसम्म अध्ययन गर्ने विद्यार्थी र शैक्षिक संस्थाको सङ्ख्या घट्दै गएको देखिएको छ ।

नेपाल राष्ट्र बैंकले सार्वजनिक गरेको आर्थिक गतिविधि अध्ययनले पछिल्लो ३ वर्षमा सुदूरपश्चिम प्रदेशमा विद्यालयदेखि क्याम्पस तहसम्म अध्ययन गर्ने विद्यार्थी र शैक्षिक संस्थाहरूको सङ्ख्या घट्दै गएको देखाएको हो ।

राष्ट्र बैंकको अध्ययनअनुसार पछिल्लो १ वर्षमा मात्रै सुदूरपश्चिम प्रदेशमा विद्यालयदेखि क्याम्पससम्मको तहमा अध्ययन गर्ने ८५ हजार १५ जना विद्यार्थी घटेका हुन् । त्यस्तै, पछिल्लो १ वर्षको समयमा सो प्रदेशमा ४१ वटा विद्यालयदेखि क्याम्पससम्मका शैक्षिक संस्था घटेको अध्ययनले देखाएको छ ।

प्रतिवेदनअनुसार आर्थिक वर्ष २०८०-८१ को असार मसान्तसम्ममा सुदूरपश्चिम प्रदेशमा सरकारी, निजी एवं सामुदायिक विद्यालय, प्राविधिक शिक्षालय, त्रिभुवन विश्वविद्यालय अन्तर्गत रहेका आङ्गिक क्याम्पस र सुदूरपश्चिम विश्वविद्यालय तथा सो अन्तर्गतका आङ्गिक क्याम्पस गरी कुल ४,४१७ वटा शैक्षिक संस्थाहरू सञ्चालनमा रहेका छन् । 

आर्थिक वर्ष २०८०-८१ मा सबै किसिमका अध्ययन संस्थाहरुमा गरी कुल ८ लाख ८४ हजार ५ सय १ विद्यार्थीहरू अध्ययनरत रहेका छन् भने उक्त संस्थाहरूमा कुल २१ हजार ८ सय ५५ जना शिक्षक-प्राध्यापकहरुले अध्यापन गराउँदै आएका छन् ।