काठमाडौं– बलिउड अभिनेत्री नोरा फतेही शनिबार मुम्बईमा सानो कार दुर्घटनामा परेकी छन् । भारतीय मिडियाका अनुसार सनबर्न फेस्टिभलमा प्रस्तुति दिन जाने क्रममा अपराह्न करिब ४ बजे मादक पदार्थ सेवन गरेका चालकले चलाएको कारले उनको सवारी साधनलाई ठक्कर दिएको हो ।

दुर्घटनापछि नोरा फतेहीलाई तत्काल नजिकैको अस्पतालमा लगेर सामान्य प्राथमिक उपचार गरिएको थियो । चिकित्सकहरूले उनको स्वास्थ्य अवस्था स्थिर रहेको र कुनै गम्भीर चोट नलागेको पुष्टि गरेका छन् । घटनाले केही समय त्रास सिर्जना गरे पनि नोरा पूर्ण रूपमा सुरक्षित रहेकी छन् ।

दुर्घटनाको पीडाका बाबजुद पनि नोरा फतेहीले आफ्नो व्यावसायिक प्रतिबद्धता कायम राख्दै सनबर्न फेस्टिभलको स्टेजमा उत्रिइन्।

उनले ऊर्जा र आत्मविश्वासका साथ दिएको प्रस्तुतिले दर्शक र फ्यानहरूको मन जितेको छ । दुर्घटनापछि पनि स्टेजमा देखिएको उनको जोश देखेर सामाजिक सञ्जालमा प्रशंसाको वर्षा भइरहेको छ । सनबर्नमा दिएको उनको प्रस्तुतिको भिडियो अहिले सामाजिक सञ्जालमा व्यापक रूपमा भाइरल भइरहेको छ ।

यस घटनापछि मुम्बई प्रहरीले मादक पदार्थ सेवन गरेर सवारी चलाउने चालकलाई नियन्त्रणमा लिएको छ । चालकविरुद्ध लापरबाहीपूर्वक सवारी चलाएको र नशामा गाडी चलाएको अभियोगमा मुद्दा दर्ता गरिएको प्रहरीले जनाएको छ । घटनाबारे थप अनुसन्धान भइरहेको छ ।