दोलखा– जिल्लाको वैतेश्वर-५ मैनापोखरी मुख्य कार्यालय रहेको जनमुखी  बचत तथा ऋण सहकारी संस्थाको २८ औ वार्षिक साधारणसभा आइतबार सम्पन्न भएको छ ।

संस्थाले २८औँ साधारण सभा मनाइरहँदा कुल दायित्व-कुल पुँजी एक अर्ब ३८ करोड ७६ लाख ३४ हजार आठ सय ७८ रुपैयाँ पुगेको संस्थाका अध्यक्ष माधव दाहालले जानकारी दिए ।

वैतेश्वर गाउँपालिका अध्यक्ष छवि लामाको उपस्थितिमा उद्घाटन गरिएको साधारण सभामा संस्थाको वार्षिक आयव्यय प्रतिवेदन अध्यक्ष दाहालले सार्वजनिक गरेका थिए ।

२८ वर्ष अघि साविकको काब्रे गाविसलाई कार्यक्षेत्र बनाउँदै स्थापना भएको उक्त सहकारीले छोटो समयमै आफ्नो कार्यक्षेत्रलाई फराकिलो बनाउँदै झन्डै साढे एक अर्ब पुँजी परिचालन गर्न सफल भएको अध्यक्ष दाहालले उल्लेख गरे । 

कार्यक्रमलाई सम्बोधन गर्दै वैतेश्वर गाउँपालिका अध्यक्ष छवि लामाले राष्ट्रिय सहकारी नियमन प्राधिकरण लगायतका नियामक निकायहरूबाट प्राप्त निर्देशनले दीर्घकालीन रूपमा संस्थालाई अझ सुदृढ,सुरक्षित बनाउन सहयोग पुग्ने बताए । 

स्थानीयको मागलाई नजिकबाट सम्बोधन गर्ने र समस्या टार्ने माध्यम सहकारी भएकाले सहकारीको संरक्षणमा सबै लाग्नुपर्ने बताए । अध्यक्ष लामाले सदस्यहरूको बचत सुरक्षाका लागि स्थानीय सरकार सधैँ सकारात्मक रहेको समेत उल्लेख गरे ।

करिब २२ हजार सदस्य आबद्ध रहेको उक्त संस्थाको आ.व २०८२/०८३ को  वार्षिक प्रगति विवरण सचिव लक्ष्मण चौलागाईँले प्रस्तुत गरेका थिए ।‍ संस्थाको सेयर पुँजी १० करोड ७३ लाख २५ हजार २ सय पुगेको जनाइएको छ। -सुवाश बस्नेत/दोलखा