काबुल– अफगानिस्तानको तालिवान सरकारद्वारा पाँच करोड ६० लाख डलर मूल्यका छ परियोजना आइतबार स्वीकृत गरेको छ।

अफगानिस्तानको राष्ट्रिय खरिद आयोगले पूर्वाधार, स्वास्थ्य सेवा र आर्थिक अवसरहरू बढाउनका लागि ३.८ अर्ब अफगानी अर्थात् पाँच करोड ६० लाख ४० हजार अमेरिकी डलर मूल्य बराबरका छ वटा विकास परियोजनाहरूलाई अनुमोदन गरेको आर्थिक मामिलाका लागि उपप्रधानमन्त्रीको कार्यालयले आइतबार घोषणा गरेको छ।

उपप्रधानमन्त्री मुल्लाह अब्दुल गनी बरादरको अध्यक्षतामा बसेको आयोगले छ वटा प्रमुख पहललाई अनुमोदन गर्नुअघि विभिन्न क्षेत्रका ३० वटा प्रस्तावहरूको समीक्षा गरेको थियो ।

परियोजना अन्तर्गत पूर्वी कुनार प्रान्तमा २०० शय्याको अस्पताल निर्माण गर्ने, पक्टिका प्रान्तमा हरितगृह स्थापना गर्ने, उत्तरी फर्याब प्रान्तमा २५ किलोमिटर सडक निर्माण गर्ने र विभिन्न प्रान्तमा विद्युत् कम्पनीहरूलाई विद्युतीय उपकरण आपूर्ति गर्ने योजना रहेको छ ।

यी पहलहरूले स्थानीय बासिन्दाहरूका लागि हजारौँ रोजगारी सिर्जना गर्ने अपेक्षा गरिएको छ, जसले दशकौँको द्वन्द्वपछि चलिरहेको सुधारको बीचमा अर्थव्यवस्थालाई पुनर्जीवित गर्ने सरकारको प्रयासलाई समर्थन गर्ने विश्वास सरकारले लिएको छ । 

सन् २०२१ अगस्टमा सत्तामा आएदेखि अफगान सरकारले आर्थिक कठिनाइको सामना गर्न र रोजगारीका अवसरहरू सिर्जना गर्न युद्धग्रस्त देशमा आफ्नो घरेलु बजेटमा धेरै विकास र पूर्वाधार परियोजनाहरू सुरु गरेको छ। रासस