काठमाडौं– पर्सामा फेरी झाडापखाला तथा हैजाका बिरामी बढ्न थालेका छन् ।
 
जिल्ला जनस्वास्थ्य कार्यालय पर्साका अनुसार शनिबार मात्र वीरगञ्ज महानगर र पोखरिया नगरपालिकाका विभिन्न क्षेत्रमा गरी २७ जनामा झाडापखाला तथा शंकास्पद हैजाको संक्रमण देखिएको छ ।

बिरामीमध्ये ४ जनामा हैजा पुष्टि भएको जनस्वास्थ्य कार्यालय पर्साका सुचना अधिकारी धनिसिंह ठकुरीले बताए । 

उनका अनुसार गत एक महिनामा पर्सामा मात्रै १ हजार ४५१ जना झाडापखाला तथा शंकास्पद हैजाका बिरामी अस्पताल भर्ना भएका थिए । तीमध्ये १ हजार ४२१ जना उपचारपछि घर फर्किएका छन् भने हाल ३० जना विभिन्न अस्पतालमा उपचाररत छन् । 

यस अवधिमा २३७ जनामा हैजा पुष्टि भएकोमा २३३ जना निको भइसकेका छन् ।  ४ जनाको उपचार जारी रहेको उनले बताए । भदौ ६ गते वीरगञ्ज–१२ मुरलीमा पहिलोपटक पुष्टी भएको हैजाको स्रोत भने अझै पत्ता लाग्न नसकेको सुचना अधिकारी ठकुरीले बताए ।