काठमाडौं– डेडिकेटेड तथा ट्रंकलाइनको बक्यौता ऊर्जा, जलस्रोत तथा सिँचाइमन्त्री कुलमान घिसिङको निर्णयलाई नेपाल विद्युत् प्राधिकरणको बोर्ड बैठक बसेर कार्यान्वयन गरिने प्राधिकरणका प्रबन्ध निर्देशक हितेन्द्रदेव शाक्यले बताएका छन् ।

आइतबार पत्रकारहरूसँग कुरा गर्दै शाक्यले कुलमान घिसिङले ऊर्जा, जलस्रोत तथा सिँचाइ मन्त्रालयको कार्यभार सम्हाल्ने क्रममा गरेको बक्यौता उठाउने निर्णय बोर्डको बैठक बसेर कार्यान्वयनमा लैजाने बताएका हुन् ।

‘यो जुन मन्त्रीज्यू को निर्णय छ, मन्त्रीज्यू नै अध्यक्ष हुने बोर्ड हो बोर्डले निर्णय गरे अनुसार तुरुन्तै अगाडि बढ्छ’, शाक्यले भने, ‘ भोलि वा पर्सीमा बोर्ड बैठक बसेर निर्णय हुन्छ ।’

तर, मन्त्रालयको जिम्मेवारीमा कुलमान घिसिङ आइसकेपछि भने उनीसँग कुराकानी नभएको बताउँदै सचिव सहसचिवहरूसँग बोर्डको बैठक बस्ने विषयमा छलफल भएको बताए ।

‘मन्त्रीज्यूसँग अहिले व्यक्तिगत छलफल त भएको छैन, अहिले बाहिर सचिव र सहसचिवज्यूहरूसँग बसेर छलफल भयो’, शाक्यले भने । 

कुलमान घिसिङले मन्त्रालयको कार्यभार सम्हाल्दा नै डेडिकेटेड र ट्रंकलाइनको बक्यौता उठाउने विषयमा पहिलो निर्णय गरेका थिए ।