काठमाडौं– चीनतर्फको मुस्ताङ नाकाबाट पछिल्लो पाँच दिनमा ३४ करोड बढी भन्सार राजस्व संकलन भएको छ । भन्सार विभागकाअनुसार भदौको ३० गतेबाट सञ्चालनमा आएको मुस्ताङ भन्सार कार्यालय, नेचुङ (कोरला) नाकाबाट असोज ४ गतेसम्म ३४ करोड ४७ लाख ४५ हजार २५२ रुपैयाँ भन्सार राजस्व संकलन भएको हो ।

असार २४ गते रसुवा जिल्लास्थित लेहेन्दे खोलामा आएको बाढीको कारण रसुवा भन्सार कार्यालय बन्द भएर चीनतर्फको आयात निर्यात प्रभावित भएको थियो ।

भदौ ३० गतेबाट सञ्चालनमा ल्याइएको भन्सार नाकाबाट पछिल्लो पाँच दिनमा २०९ वटा विद्युतीय गाडी र १०७ वटा मालवाहक ढुवानी साधन आयात भएको विभागले जनाएको छ ।

विभागले मुस्ताङ नाकामा आशिकुडा प्रणाली समेत सञ्चालन भइसकेको जनाएको छ भने र नेपाल राष्ट्र बैंकले पनि परिपत्र जारी गरेर सो नाकाबाट प्रतितपत्र जारी गरेर सामान आयात गर्न सकिने व्यवस्था गरेको छ ।