काठमाडौं– गाजा क्षेत्रमा स्थल आक्रमण गर्न इजरायली फौजले दशौँ हजार जगेडा सैनिकलाई बोलाएको छ । समचार संस्था एपीका अनुसार इजरायली प्रतिरक्षा बल आईडीएफले ६० हजारभन्दा धेरै जगेडा सैनिकलाई बोलाएको हो ।

इजरायलले गाजा शहर र गाजा क्षेत्रका बाक्लो जनसङ्ख्या रहेका अन्य क्षेत्रमा स्थल आक्रमणको योजना बनाएको छ । यसअघि नै इजरायलले गाजा क्षेत्रका ७५ प्रतिशत भूभागमा नियन्त्रण हासिल गरिसकेको बताइएको छ ।

थप स्थल आक्रमणले सो क्षेत्रमा थप विनाश र हताहती निम्त्याउने निश्चित छ । यसले उसै पनि चरम मानवीय सङ्कटको सामना गरिरहेको गाजाको अवस्था थप गम्भीर हुने अन्तर्राष्ट्रिय संघसंस्थाले चिन्ता व्यक्त गरेका छन् ।

गाजा क्षेत्रमा स्थल आक्रमणलाई विस्तार गर्ने इजरायली सेनाको योजनाको व्यापक विरोध भइरहेको छ । हाल हमासको कब्जामा रहेका बन्धकका आफन्त र परिवारले सैन्य कारवाहीको विरोध गरेका छन् ।

यसअघि इजरायली सेनाका पूर्व सुरक्षा अधिकारीहरुले सैन्य कारवाहीबाट थोरैमात्र लाभ मिल्ने भन्दै असन्तुष्टि व्यक्त गरेका छन् । केही दिनअघि लाखौँ इजरायली नागरिकहरु सडकमा उत्रिएर सरकारको कदमको विरोध गरेका थिए ।

अझ जगेडा सैनिकलाई युद्धमा परिचालन गर्ने निर्णयले इजरायली जनताको आक्रोश थप बढाउने विश्लेषण गरिएको छ ।

इजरायली सेनाका अधिकारीले नाम नभन्ने सर्तमा एपीलाई बुधबार बताएअनुसार इजरायली सेना विस्तारै गाजा शहरमा प्रवेश गर्नेछ । इजरायली सेनाले गाजा शहरका केही भागमा अझै पनि इजरायली फौजको नियन्त्रण छैन । ती भागमा हमासले अझै पनि सैन्य र प्रशासनिक गतिविधि गरिरहेको बताइन्छ ।

ती अधिकारीले जगेडा सैनिकलाई परिचालन गर्ने प्रक्रिया पूरा हुन केही साता लाग्नसक्ने उल्लेख गरेका छन् ।

प्रधानमन्त्री बेन्जामिन नेतान्याहूले आफ्ना सेनाको कारवाही गाजा क्षेत्रको शरणार्थी शिविरमा पनि विस्तार हुने बताएका छन् । त्यसबाहेक मध्य गाजाको डिअर अल बलाह शहरमा पनि इजरायली सेनाले कारवाही गर्ने अपेक्षा गरिएको छ । यो शहरको अवस्था अन्य स्थानको तुलनामा सग्लै रहेको बताइएको छ ।