काठमाडौं– इजरायली सेनाले गाजा सहर कब्जा गर्ने योजनाअन्तर्गत कारबाही प्रक्रिया अगाडि बढाएको छ । सेनाका अनुसार गाजा सहरको बाहिरी क्षेत्र नियन्त्रणमा लिइसकेको दाबी नै गरिसकेको छ ।

बीबीसीले एक सैन्य प्रवक्ताको हवाला दिँदै जैतुन र जबालिया क्षेत्रमा कब्जाको तयारीका लागि पहिलेदेखि नै सैनिक तैनाथ गरिएको समाचारमा उल्लेख गरेको छ ।

गाजा सहर कब्जा गर्ने सैन्य अभियानलाई मङ्गलबार रक्षामन्त्री इजरायल काट्जले अनुमति दिएका थिए । गत साता अन्तिमतिर सुरक्षा मन्त्रिपरिषदमा उक्त अभियानको प्रस्ताव पेस भएको थियो ।

यसैबीच, सैन्य अभियानले प्यालेस्टाइनी नागरिकमाथि पर्ने असरलाई लिएर अन्तर्राष्ट्रिय स्तरमा इजरायलको निन्दा भइरहेको छ ।

समाचार एजेन्सी रोयटर्सका अनुसार सशस्त्र समूह हमासले इजरायलमाथि युद्धविराम सम्झौतामा अड्चन उत्पन्न गरेको र निर्दोष नागरिकविरुद्ध बर्बर युद्ध जारी राखेको आरोप लगाएको छ ।