भक्तपुर – ऊर्जा, जलस्रोत र सिंचाई मन्त्री दीपक खड्काले नेपाली र थाई खानाको सांस्कृतिक महत्त्वलाई जोड दिएका छन्। नेपाल र थाइल्यान्डको आपसी सम्बन्धलाई थप सुदृढ बनाउन र नेपाली भोजनको अन्तर्राष्ट्रिय प्रचार प्रसारका लागि भोजन लिपि स्वाद कार्यक्रमको महत्त्वलाई उच्च रहेको उनको भनाइ छ ।

उनले भोजन लिपि स्वाद कार्यक्रमको छैठौं संस्करणको उद्घाटन समारोहमा भने, ‘थाई खाना नेपालीलाई र नेपाली खाना विदेशीलाई परिचित गराउनु हाम्रो साझा जिम्मेवारी हो। यसले आपसी मित्रता र सांस्कृतिक सम्बन्धलाई बलियो बनाउँछ, साथै थाईलैंडसँगको हाम्रो सम्बन्धलाई अझ प्रगाढ बनाउँछ।’

मन्त्री खड्काले कार्यक्रमलाई नेपाल र थाइल्यान्ड बीचको खाद्य संस्कृति र आपसी मित्रता थप प्रगाढ बनाउन एक महत्त्वपूर्ण कदम भनेका छन्। उनले भने, ‘नेपालमा पनि सुरक्षित र स्वस्थ भोजन प्रबर्द्धन गर्नका लागि हामी निरन्तर प्रयासरत छौं। नेपाली खानालाई अन्तर्राष्ट्रिय बजारमा प्रस्तुत गर्दा त्यसको परिष्कृत रूपले विदेशी बजारमा राम्रो प्रतिस्पर्धा गर्न सक्छ।’

कार्यक्रममा योयल थाई दूतावास, काठमाडौंका राजदूत सुवापोंग सिरिसोर र कार्यक्रमका अध्यक्ष गणेश ढकालले नेपाली र थाई खाद्य संस्कृति बीचको सम्बन्धलाई बढावा दिनको लागि यस्तो आयोजनालाई समर्थन गर्नुपर्ने बताए।

कार्यक्रमको संयोजन भोजन लिपि स्वाद अभियानका संयोजक देवी सपकोटाले गरेका थिए । शेफ घनश्याम कँडेल र उनको टिमले तयार पारेका विभिन्न थाई र नेपाली परिकारले आगन्तुकको मन जितेका थिए।