काठमाडौं– प्रतिपक्षी राष्ट्रिय स्वतन्त्र पार्टी (रास्वपा) को अवरोधका बीच प्रतिनिधिसभाको बैठकमा मन्त्रालयअन्तर्गत विनियोजन बजेटमाथिको छलफल चलिरहेको छ । 

रास्वपाका सांसदहरू शनिबारको बैठकमा पनि वेल घेराउ गरेर उभिरहेका छन् । तर, सभामुख देवराज घिमिरेले पूर्ववत् तरिकाले संसद्को कारबाही अघि बढाएका छन् । 

यसअघि शनिबारको बैठकमा रास्वपाकी सांसद सुमना श्रेष्ठ र राप्रपाकी सांसद रोशन कार्कीले भिजिट भिसा प्रकरणबारे पार्टीका धारणा राखेका थिए । सभामुख घिमिरेले उपलब्ध गराएको समयमा बोल्दै रास्वपाकी सांसद श्रेष्ठले माग सुनुवाइ नभएको भन्दै आपत्ति जनाएकी थिइन् । 

राप्रपाकी सांसद कार्कीले गृहमन्त्री रमेश लेखकको राजीनामा माग गरेकी थिइन् । रास्वपाले शुक्रबारको संसद् बैठक बहिष्कार गरेको थियो भने राप्रपा त्यसअघिबाटै संसद् बहिष्कार गर्दै आएको थियो ।