काठमाडौं- ऊर्जा, जलस्रोत तथा सिँचाइमन्त्री दीपक खड्काले ‘लोडसेडिङ भयो’ भनेर सामाजिक सञ्जालमा फैलाइएको हल्ला आधारहीन भएको बताएका छन् ।

मन्त्री खड्काले अहिले नेपालको विद्युत् उत्पादन बढेसँगै आन्तरिक माग पूरा गरी बुधबारदेखि भारततर्फ निर्यात सुरू भएको जानकारी दिएका छन् ।

प्रतिनिधिसभा पूर्वाधार विकास समितिको बुधबार बसेको बैठकमा बोल्दै मन्त्री खड्काले नेपालको आन्तरिक माग पूरा गरेपछि भारततर्फ निर्यात सुरू गरिएको बताए ।

उनले भारतबाट ३५० मेगावाट विद्युत आयात भइरहेको अवस्थामा वर्षा लागेसँगै उत्पादन बढेर आयात रोकेर निर्यात थालिएको बताए ।

मन्त्री खड्काले हिउँदमा उत्पादन घटेका बेला करिब एक हजार ५५ मेगावाटसम्म विद्युत् भारतबाट आयात गरिएको उल्लेख गरे ।

तर अहिले उत्पादन बढेपछि सर्वसाधारण र उद्योगलाई समेत पर्याप्त विद्युत् पुग्नेगरी आपूर्ति भइरहेको उनले बताए ।

मंगलबार मध्यरातदेखि भारतमा १५० मेगावाट विद्युत बिक्री गरिएको मन्त्री खड्काले बताए ।

पछिल्लो समय देशमा लोडसेडिङ भएको भन्ने हल्लाबारे गम्भीर आपत्ति जनाउँदै यसलाई नियोजित भ्रम फैलाउने अभियानको संज्ञा खड्काले दिए।