काठमाडौं- नेकपा (एमाले) का सचिव योगेश भट्टराईले पोखरा र भैरहवा अन्तर्राष्ट्रिय विमानस्थल निर्माणमा भएको भनिएको अनियमिततामा आफ्नो संलग्नता पुष्टि गर्न चुनौती दिएका छन् ।

पूर्वसंस्कृति, पर्यटन तथा नागारिक उड्यनमन्त्री भट्टराईले पोखरा र भैरहवा अन्तर्राष्ट्रिय विमानस्थलको भ्रष्टाचार प्रकरणमा आरोप लगाउने नै उल्टै पर्ने दाबी गरे । उनले यी दुई विमानस्थल निर्माणको फाइलमा आफ्नो एउटा पनि हस्ताक्षर देखाउन चुतौती दिएका हुन्।

समाजिक सञ्जालमार्फत् भनाइ सार्वजनिक गर्दै भट्टराईले आफूलाई यी दुई विमानस्थलको विवादमा मुछ्नेहरू नै पर्ने दाबी गरे । उनले त्यसको प्रमाण आफूसँग रहेको पनि बताएका छन् । ‘मलाई औँला उठाउनेहरू नै यी दुई विमानस्थल निर्माणको अनियमितता प्रकरणमा पर्नेवाला छन्। डकुमेन्ट मसँग छ । आवश्यक परे सार्वजनिक गरौँला’, उनले भनेका छन् ।

उनले भ्रष्टाचारको दलदलमा परेकाहरूले काँक्रा आफू खाएर बियाँ अर्काको निधारमा टाँस्न खोजेको पनि बताए । ‘सत्ता र पदको दुरुपयोग गरेर भ्रष्टाचार र बेथितिको दलदलमा जाकीएकाहरू काँक्रा आफू खाने र बियाँ अर्काको निधारमा टाँस्न कती खप्पिस छन् भन्ने मैले राम्ररी बुझेको छु,’ भट्टराईले भनेका छन्, ‘मिडिया ट्रायल गरेर उम्कन सकिन्छ भनेर ढुक्क नभए हुन्छ ।’

भट्टराईले २०७६ साउन १५ गतेदेखि २०७७ पुस ५ गतेसम्म संस्कृति, पर्यटन तथा नगारिक मन्त्रीको जिम्मेवारी सम्हालेका थिए ।

आफू पर्यटनमन्त्री हुँदा आफ्नो निर्णयले राज्यलाई कुनै नोक्सानी भए प्रमाणसहित सार्वजनिक गर्नसमेत भट्टराईले चुनौती दिएका छन् ।

‘उक्त समयमा पोखरा र भैरहवा विमानस्थलबारे मेरो हस्ताक्षरमा कुनै निर्णयले राज्यलाई नोक्सानी भएको भए प्रमाणसहित सार्वजनिक गर्न मेराविरुद्ध प्रायोजित समाचार उत्पादन गर्ने कारखानालाई चुनौती छ’, उनले भनेका छन् ।