काठमाडौं– आगामी वैशाख २६ बाट फिल्म ‘जार’ प्रदर्शनमा आउँदैछ । यस फिल्ममा नायकहरू सौगात मल्ल, अनुपविक्रम शाही र नायिका गीताञ्जली थापा शीर्ष भूमिकामा छन् । 

प्रदर्शन मिति नजिकिँदै गर्दा यो फिल्म निर्माण पक्ष प्रचारको तयारीमा छ । यो फिल्म साहित्यकार इन्द्रबहादुर राईको ऐतिहासिक कथामा आधारित छ । 

निर्देशक फुर्वा भन्छन्, ‘यो फिल्मले सन् १८०० को कालमा नेपाली समाजमा घटेको यथार्थ घटना समेटेको छ ।’

वैशाख २६ बाट दर्शकले विषय, प्रस्तुति र प्राविधिकरुपमा बलियो फिल्म हेर्न पाउने उनी दाबी गर्छन् । भन्छन्, ‘विषयको भन्नुपर्दा हामीले नेपाली समाजले भोगेको अब्बल घटना उठान गरेका छौँ । यो कथालाई म हरेक समाजको भन्न रुचाउँछु ।’

त्यस्तै, निर्देशक फुर्वा प्राविधिकरुपमा पनि आफ्‌नो फिल्म बलियो बनाउन कुनै सम्झौता नगरिएको बताउँछन् । भन्छन्, ‘प्राविधिक पक्ष कमजोर नहोस् भन्ने उद्देश्यले नै हामीले फिल्मको पोस्ट प्रोडक्सनको काम भारतमा गरेका छौँ ।’

उनी फिल्ममा कलाकारले गरेको अभिनयप्रति पनि सन्तुष्ट छन् । उनी भन्छन्, ‘बजारमा को चलेको छ भन्दा पनि कथाको मागअनुसारको कलाकार चयन गरेको थियौँ । उहाँहरूले पनि कठोर मिहिनेत गर्नुभयो । त्यो कुरा दर्शकले फिल्म प्रदर्शनमा आएपछि थाहा पाउनुहुनेछ ।’

होप रल्सि, एलए सेभेन सट्र्स, बराल स्टुडियो र कवि प्रोडक्सनको सहकार्यमा यो फिल्म बनेको हो ।