काठमाडौं – शनिबार सुरु हुने आइपीएलको राजस्थान रोयल्सको सुरुवाती तीन खेलमा रियान परागले नेतृत्व गर्ने भएका छन्। औलाको चोटसँग सङ्घर्ष गरिरहेका नियमित कप्तान सञ्जु सामसन प्रशिक्षणमा उपस्थित भइसकेका छन्।

चिकित्सकले विकेट किपिङ र फिल्डिङका लागि योग्य ठहर गरेपछि मात्र उनले ब्याटिङ गर्ने छन्। राजस्थानमा अर्का विकेटकिपर ब्याट्सम्यान ध्रुव जुरेल भएका कारण उनले इम्प्याक्ट खेलाडीको रूपमा सहभागिता जनाउने छन्। उनी पूर्ण रूपमा फिट भएपछि राजस्थानको नेतृत्व गर्ने छन्।

इङ्गल्यान्डसँगको शृङ्खलाको पाँचौँ टी–२० खेलमा जोफ्रा आर्चरको बलले लागेपछि औलामा चोट पुगेको हो।

परागले पहिलो पटक राजस्थानको नेतृत्व सम्हाल्न आँटेका हुन्। उनी इतिहासका पाँचौँ कान्छा कप्तान हुन्। सन् २०१९ देखि उनी राजस्थानमा छन्। यस सिजन फ्रेन्चाइजले उनलाई १४ करोड भारतीय रुपियाँमा रिटेन गरेको हो। गएको सिजन उनले ५७३ रन प्रहार गरेका थिए। समग्रमा यो तेस्रो धेरै तथा राजस्थानको सबैभन्दा धेरै व्यक्तिगत स्कोर हो।

आइपिएलमा प्रहार गरेको चार अर्धशतककै कारण उनले भारतको राष्ट्रिय टोलीबाट डेब्युको अवसर पाएका थिए।

२३ मार्चमा परागको नेतृत्वमा राजस्थानले पहिलो खेल सनराइजर्स हैदरावादसँग खेल्ने छ। २६ मार्चमा राजस्थानले घरेलु भूमिमा साबिक विजेता कलकत्ता नाइटराइडर्ससँग खेल्ने छ। ३० मार्चमा चेन्नाइ सुपर किङसँग खेल्ने छ