काठमाडौं- प्रधानमन्त्री केपी शर्मा ओलीले स्वीट्जरल्यान्डको बैंकमा पैसा लुकाएको भनेर आफूविरुद्ध अनर्गल प्रचार गरिएको बताएका छन् ।

ईश्वरलाल प्रतिष्ठानद्वारा प्रकाशित व्यावसायी तथा समाजसेवी राजेशकाजी श्रेष्ठको जीवनीमा आधारित ‘व्यक्तित्व योगदान’ पुस्तकको शुक्रबार लोकार्पण गर्दै उनले यसो भनेका हुन् ।

उनले स्वीस बैंकमा पैसा राख्नुपर्ने कुनै जरुरी नरहेको पनि बताएका छन् । ‘मलाई किन त्यत्रो सम्पति चाहियो ? दुइटा रोटी र अलिकति दाल खाने हो । मैले सम्पति लुकाउनुपर्ने केही कारण छैन’, उनले भने, ‘मेरो सबै जीवन खुल्ला र पारदर्शी छ । यस्ता अनेक हल्ला चलाउने, भ्रम फिँजाउने र दुर्वाच्य बोल्ने हाम्रो सभ्यता होइन ।’

सम्बोधनका क्रममा ओलीले सुशासनबाट मात्रै देशलाई समृद्धितिर लान सकिने बताए । उनले सुशासन एउटा गम्भीर चुनौतीका रुपमा रहेकाले छिटो छरितो कानुन बनाएर काम अगाडि बढाउने प्रक्रियामा सरकार रहेको स्पष्ट पारे ।

प्रधानमन्त्री ओलीले व्यावसायको क्षेत्रसहित नेपाल चेम्बर अफ कमर्शको संस्थागत विकासमा योगदान दिएका राजेशकाजी श्रेष्ठको व्यक्तित्व र कृतित्व नयाँ पुस्ताका लागि प्रेरणदायी हुने बताए ।