काठमाडौं- नेपाली कांग्रेसका महामन्त्री गगनकुमार थापाले अब कसैले पनि लोकतन्त्रको विकल्प नखोज्ने बताएका छन् ।

फागुन ७ गतेको प्रजातन्त्र दिवसका अवसरमा पूर्वराजा ज्ञानेन्द्र शाहले विकल्प खोज्ने बेला आएको र त्यसका लागि आफू तयार भएको सन्देश दिएको सन्दर्भमा थापाको यस्तो भनाइ आएको हो ।

‘मलाई के विश्वास छ भने अब कसैले पनि लोकतन्त्रको विकल्प खोज्दैन’, उनले विराटनगर विमानस्थलमा भने, ‘म त्यस्तो कुराको कल्पना पनि गर्दिनँ र त्यो मान्दा पनि मान्दिनँ । लोकतन्त्रको विकल्प खोज्ने विषयमा छलफल पनि नगरौँ ।’

उनले अहिले सरकारमा रहेका कांग्रेसका मन्त्रीहरूलाई सबैले मिलेर सफल बनाउनुपर्ने पनि बताइ । ‘पार्टीबाट सरकारमा जिम्मा पाएका साथीहरूलाई थप सफल बनाउने हो । गलत काम नगर भन्ने हो’, उनले भने, ‘साथीहरूलाई खबरदारी र प्रश्न गर्ने कुरालाई जारी राखेर सफल बनाउनुपर्छ ।’

उनले कांग्रेसको महाधिवेशनलाई नियमित प्रक्रिया भनेका छन् । ‘महाधिवेशनमा समूह बन्छन्, प्यानल बन्छन्, चुनाव भिडिन्छ । त्यो लोकतान्त्रिक अभ्यास हो’, उनले भने, ‘हामीले १५ औँ महाधिवेशन प्रक्रिया थालिसकेका छौँ । विधानले तोकेको सीमाभित्र महाधिवशेन हुन्छ ।’