काठमाडौं- इतिहास अन्वेषणमा सक्रिय लेखक राजकुमार दिक्पालद्वारा लिखित दुई पुस्तक विश्वविद्यालयको पाठ्यक्रममा समावेश गरिएको छ ।

नेपाल खुला विश्वविद्यालयले हालै निर्माण गरेको स्नातक तहको ‘मगर अध्ययन’ विषयको पाठ्यक्रम दिक्पालको दुई पुस्तक समावेश गरिएको हो ।

विश्वविद्यालयको सामाजिकशास्त्र तथा शिक्षा सङ्काय अन्तरगत स्नातक तहमा अध्यापन हुने उक्त पाठ्यक्रममध्ये पहिलो वर्षको पहिलो सेमेस्टरअन्तरगत चौथो इकाईको ‘नेपालको आधुनिक इतिहासमा मगरहरू’ पाठमा मनोज घर्तीमगरसहितको सहलेखनमा लेखिएको ‘मगर इतिहास’ र सातौँ इकाईको ‘आदिवासी मगर आन्दोलनको इतिहास’ अन्तरगत ‘आदिवासी विद्रोहको इतिहास’ पुस्तकलाई पाठ्यक्रममा समावेश गरिएको छ ।

विश्वविद्यालयले यसै शैक्षिक सत्रदेखि अध्यापन गर्ने गरी विद्यार्थी भर्नाको आवेदन आह्वानसमेत गरिसकेको छ ।

यी वाहेक लेखक दिक्पालको ‘पृथ्वीनारायण शाहः आलोचनात्मक इतिहास’, ‘जङ्गबहादुरको युग’ गरी चार वटा इतिहासको तथा ‘आतङ्कको छायाँमुनि’ कथा सङ्ग्रह गरी पाँच पुस्तक प्रकाशित छन् ।